Síðasti dagur í dag til að senda stjórnvöldum áminningu.

Áform ríkisstjórnar Íslands um að afnema áminningarskyldu ríkisstarfsmanna hafa vakið harða gagnrýni. Gagnrýnendur telja að breytingin feli í sér eina alvarlegustu skerðingu á réttindum starfsfólks hins opinbera í langan tíma og muni draga verulega úr starfsöryggi.

Bent er á að áminningarskylda sé mikilvægur þáttur í réttlátri málsmeðferð þar sem starfsfólk fær tækifæri til að bæta ráð sitt. Í flestum tilvikum megi rekja vandamál til aðstæðna á vinnustað, svo sem óljósra væntinga, mikils álags eða skorts á þjálfun, og reynslan sýni að starfsfólk bregðist oft vel við slíkri endurgjöf. Afnám áminningarskyldu auki hins vegar líkur á óréttmætum og tilhæfulausum uppsögnum.

Réttindi launafólks séu ekki tilviljun heldur afrakstur langrar baráttu gegn valdaójafnvægi á vinnumarkaði. Því sé breyting sem þessi talin fordæmalaus og endurspegla hagsmuni stjórnenda frekar en starfsfólks.

Í ljósi þessa er allt launafólk hvatt til að senda stjórnvöldum áminningu og skýr skilaboð um að hafna beri afnámi áminningarskyldu og verja þannig grundvallarréttindi á íslenskum vinnumarkaði. Í dag er síðasti dagurinn til að senda stjórnvöldum áminningu.