Vorskýrsla kjaratölfræðinefndar 2026 komin út

Kjarasamningar hafa nú verið gerðir fyrir nær allt launafólk á íslenskum vinnumarkaði. Alls hafa verið undirritaðir um 260 samningar sem ná til langflestra starfsmanna, en óloknir samningar ná aðeins til um 1% launafólks.

Samningarnir eru að mestu til fjögurra ára og fela í sér blöndu krónutölu- og prósentuhækkana. Hækkanirnar hafa hlutfallslega komið best út fyrir tekjulægri hópa og hafa auk þess verið samið um ýmsa viðbótarlaunaauka.

Á almennum vinnumarkaði nam hækkun grunntímakaups 17%, hjá ríkinu 14,8%, hjá Reykjavíkurborg 13,8% og hjá öðrum sveitarfélögum 15,3%.

Regluleg laun fullvinnandi fólks voru að meðaltali 913 þúsund krónur á mánuði árið 2025, samanborið við 847 þúsund krónur árið áður. Miðgildi reglulegra launa mældist 826 þúsund krónur.

Þrátt fyrir jákvæða launaþróun hefur efnahagsumhverfið reynst erfiðara en vænst var þegar samið var. Þar sem áður var gert ráð fyrir 7,7% samanlögðum hagvexti á árunum 2023–2026 benda nýjar horfur til að hann verði aðeins um 1,6%.

Landsframleiðsla jókst um 1,3% árið 2025 og hagvöxtur mældist 2,7% á fyrsta ársfjórðungi 2026. Á sama tíma hefur framleiðni vinnuafls dregist saman og atvinnuleysi aukist. Samkvæmt vinnumarkaðsrannsókn Hagstofunnar var atvinnuleysi 7,3% á fyrsta ársfjórðungi 2026, samanborið við 4,9% ári fyrr.

Verðbólga hefur einnig reynst þrálátari en vonast var til og hefur tekið að aukast á ný undanfarna mánuði. Til að bregðast við þeirri þróun hefur Seðlabanki Íslands hækkað stýrivexti tvisvar á árinu, úr 7,25% í 7,75%, sem hefur leitt til hækkunar óverðtryggðra útlánsvaxta hjá lánastofnunum.

Skýrslan er gefin út af Kjaratölfræðinefnd, samstarfsvettvangi stjórnvalda, sveitarfélaga og aðila vinnumarkaðarins, og er ætlað að veita sameiginlega mynd af þróun launa, vinnumarkaðar og efnahagsmála í aðdraganda og eftirfylgni kjarasamninga.

Hægt er að lesa skýrsluna í heild sinni hér