Landsfundur bæjarstarfsmannafélaga 2025 haldinn á Akureyri

Landsfundarfólk heimsótti flugsafnið á Akureyri

Landsfundur bæjarstarfsmannafélaga fór fram dagana 19.–21. nóvember 2025 í Menningarhúsinu Hofi á Akureyri. Á fundinn mættu formenn félaga, fulltrúar stjórna og samninganefnda félaganna. Dagskráin var nokkuð þétt þar sem farið var yfir stöðu og starfsemi félaganna, samstarfsvettvang innan BSRB, kjaramál og fræðslu.

Fundurinn hófst miðvikudaginn 19. nóvember með setningu Örnu Jakobínu Björnsdóttur, formanns Kjalar stéttarfélags, sem bauð þátttakendur velkomna með hátíðlegum hætti. Í kjölfarið kynntu bæjarstarfsmannafélög víðs vegar af landinu starfsemi sína, sögu og verkefni, og lögðu sérstaka áherslu á mikilvægi trúnaðarmanna og þjónustu við félagsfólk. Að því loknu flutti Sonja Ýr Þorbergsdóttir, formaður BSRB, erindi um starfsemi og þróun innan BSRB. Dagurinn endaði með kvöldverði á Hótel KEA.

Fimmtudaginn 20. nóvember var megináherslan á þjónustuviðmið BSRB og samstarf félaganna. 

Unnið var í hópum þar sem fjallað var um hagsmunagæslu, þjónustu, stafrænar lausnir og samstarfsvettvang félaganna og BSRB. Eftir hádegi fóru fram umræður um kjaramál rýnt var í reynslu af síðustu kjarasamningum, sameiginlega forgangsröðun og skipulag vinnu samninganefnda. Síðar sama dag hélt Þórgnýr Dýrfjörð heimspekingur erindi um dyggðasiðfræði og siðferðileg viðmið í starfi. Kvöldið endaði á hátíðardagskrá sem hófst með fordrykk á skrifstofu Kjalar áður en haldið var í óvissuferð.

Föstudaginn 21. nóvember var sjónum beint að fræðslumálum. Kynntir voru helstu fræðsluaðilar auk Mannauðssjóðsins Heklu, þar sem Hrund Hlöðversdóttir, framkvæmdastjóri sjóðsins, gerði grein fyrir starfsemi og hlutverki hans. Að lokum fór fram opið samtal og hugmyndavinna um þróun fræðslu og mannauðsmála. Fundi var slitið kl. 11:00.

Landsfundur bæjarstarfsmannafélaga markaði tækifæri til samráðs, upplýsingamiðlunar og efldrar samvinnu milli félaga og var ánægjulegur vettvangur fyrir áframhaldandi uppbyggingu í þágu félagsfólks víðs vegar um land.

Hér má sjá nokkrar myndir frá fundinum.